ᐱᒻᒪᕆᐅᔪᑦ ᐱᕙᓪᓕᐊᓂᐅᔪᑦ
ᓄᓇᕗᑦ, ᐃᓱᒪᒋᔭᐅᓗᐊᖅᐸᓚᐅᙱᑦᑐᖅ ᑕᐃᑉᓱᒪᓂ ᐅᔭᕋᒃᓯᐅᖅᑎᓄᑦ, ᒫᓐᓇᐅᓕᖅᑐᖅ ᐱᒻᒪᕆᐊᓗᒃᑯᑦ ᐅᔭᕋᑦᑎᐊᕙᖃᕐᓂᕋᖅᑕᐅᓯᒪᔪᖅ. ᑭᕙᓪᓕᖅ ᑕᑯᓯᒪᔪᖅ ᐱᒻᒪᕆᐊᓗᖕᓂᒃ ᐅᔭᕋᒃᓯᐅᕐᓂᐅᓯᒪᔪᓂᒃ ᒫᓐᓇᓵᖑᔪᖅ ᐅᑭᐅᓂᒃ ᖄᖏᓵᖅᑐᓂᒃ, ᐱᓗᐊᖅᑐᒥ ᒎᓘᒧᑦ, ᓄᖑᔪᐃᑦᑐᒧᑦ ᐊᒻᒪᓗ ᐊᓯᖏᓐᓄᑦ ᐅᔭᖅᑲᓄᑦ. ᓇᐅᔮᑦ ᖃᓂᒋᔭᖓ ᒫᓐᓇᐅᔪᖅ ᐱᒻᒪᕆᐊᓗᒃᑯᑦ ᐅᔭᕋᒃᓯᐅᕐᕕᐅᓯᒪᔪᖅ ᒎᓘᒧᑦ ᐊᒻᒪᓗ ᐅᔭᖅᑲᓄᑦ ᓯᑎᔪᓄᑦ.
ᕿᓚᓗᒐᖅ ᐱᓕᕆᐊᖑᔪᖅ
ᓯᑐᐊᓄᕖ ᑕᐃᒪᓐᑯᑦ ᒫᓐᓇᐅᔪᖅ ᐅᔭᕋᒃᓯᐅᖅᑐᑦ ᓯᑎᔪᓂᒃ ᐅᔭᖅᑲᓂᒃ ᓇᐅᔮᑦ ᖃᓂᒋᔭᖓᓂ. 183,000-ᓂᒃ ᕼᐃᒃᑕᓂᒃ ᐊᖏᓂᓕᒃ ᓄᓇ ᐃᒻᒪᖄ 10 ᑭᓛᒥᑕᒥᒃ ᐅᖓᓯᖕᓂᓕᒃ ᓇᐅᔮᑦ ᐅᐊᖕᓇᖓᒍᑦ ᐊᒻᒪᓗ ᓄᓇᐅᔪᖅ ᐊᒃᑐᖅᓯᓂᖃᖅᖢᓂ ᕇ ᐃᔅᒪᔅᒥ ᑲᒥᑎ ᐸᐃᒧᑦ. ᖃᓄᐃᑦᑐᕈᓘᔭᐃᑦ ᐅᔭᕋᒃᓯᐅᕐᓂᐅᔪᑦ ᓴᖅᑭᖃᑦᑕᖅᓯᒪᔪᑦ ᑕᒡᕙᓂ ᓄᓇᒥ ᖃᐅᔨᔭᐅᖅᑳᓚᐅᖅᑎᓪᓗᒍ 2001. ᓄᓇᓕᕆᓂᖅ ᓴᖅᑭᑎᑦᑎᓯᒪᔪᖅ ᐃᒻᒪᖄ 81 ᒥᓕᔭᓐᓂᒃ ᑕᓐᓂᒃ ᐱᑕᖃᕐᓂᖓᓄᑦ ᑭᒻᐳᓚᐃᑦᓂᒃ ᐃᑎᓂᖃᖅᖢᓂ 330 ᒦᑕᓂᒃ, ᖃᓄᐃᑦᑑᓂᖓ 27-ᓂᒃ 33-ᓄᑦ ᑭᐊᕆᑦᖑᔪᑦ 100 ᑕᓐ ᐃᓗᐊᓂ.
ᒪᐃ 2010-ᒥ, ᓯᑐᐊᓄᕖ ᑕᐃᒪᓐᑯᑦ ᐃᓚᓯᒋᐊᓚᐅᖅᑐᑦ ᓇᖕᒥᓂᖃᕐᓂᕐᒥᓂᒃ ᓄᓇᒥ 100%-ᒧᑦ ᐱᕕᒃᓴᖃᖅᑎᑦᑎᓪᓗᑎᒃ ᓇᖕᒥᓂᖃᖃᑎᒋᓚᐅᖅᑕᒥᓂᒃ, BHP ᐱᓕᑕᓐᑯᓐᓂ, 3%-ᒥᒃ ᐱᕙᓪᓕᐊᓂᕆᔭᖓᓂ ᕿᑐᕐᖏᐅᕈᑎᒃᑯᑦ ᐊᒻᒪᓗ 3%-ᒥᒃ ᐅᑎᖅᑐᒃᓴᓕᖓᓂ ᕿᑐᕐᖏᐅᕈᑎᒃᑯᑦ ᓱᓇᑐᐃᓐᓇᒃᑯᑦ ᓴᖅᑭᑦᑐᒃᑯᑦ. (http://www.stornowaydiamonds.com)
ᑲᒥᑎ ᐸᐃᒥ ᐱᓕᕆᐊᖑᔪᖅ
ᓄᐊᑦ ᑲᓐᑐᕇ ᒎᓘᒃᑯᑦ (ᐃᓗᐃᑦᑐᒃᑯᑦ ᓇᖕᒥᓂᕆᔭᐅᔪᑦ CBR ᒎᓘᒧᑦ ᑎᒥᖁᑎᒋᔭᐅᔪᒧᑦ) 100%-ᒥᒃ ᓇᖕᒥᓂᖁᑎᓕᒃ ᑲᒥᑎ ᐲᒥ ᐱᓕᕆᐊᖑᔪᒥ. ᓄᓇᐅᔪᖅ 100 ᑭᓛᒥᑕᒥᒃ ᐅᖓᓯᖕᓂᓕᒃ ᓇᐅᔭᑦ ᐅᐊᖕᓇᖓᑕ ᑲᓇᖕᓇᖅᐸᓯᖓᓄᑦ.
ᓄᐊᑦ ᑲᓐᑐᕇ ᒎᓘᒃᑯᑦ ᑎᒥᖁᑎᒋᔭᐅᔪᖅ ᐊᐅᓚᑦᑎᔪᖅ ᐊᖏᓂᖅᐹᖑᖃᑕᐅᔪᒥ ᐅᔭᕋᒃᓯᐅᕐᕕᐅᓯᒪᙱᓐᓂᖅᐹᖑᖃᑕᐅᔪᒥ ᒍᕇᓐᓯᑑᓐᑯᑦ ᐃᓂᖓ 180-ᓂᒃ ᑭᓛᒥᑕᓂᒃ ᐊᐳᖅᑎᓐᓈᖅᑑᑉ ᐅᐊᖕᓇᖓᑕ ᐱᖓᖕᓇᖓᓃᑦᑐᖅ. ᑐᕇ ᐸᓚᕝᑯᑦ ᑕᐃᒪᓐᓇᕐᓚᒃᑕᐅᖅ ᐱᖃᖃᑦᑕᖅᑐᑦ, ᐅᔭᕋᖕᓂᐊᕐᓂᐅᔪᖅ ᖃᖓᐅᔪᕐᓗ ᓴᖅᑭᓯᒪᓂᖏᑦ ᐊᒡᓂᒍ ᐃᒍᒃᑯᑦ ᐊᐳᖅᑎᓐᓈᖅᑐᒥ ᐅᔭᕋᖕᓂᐊᕐᓂᐅᔫᑉ ᐃᓗᐊᒍᑦ. ᑲᒻᐸᓂᐅᔪᖅ ᑎᒍᒥᐊᖅᑎᐅᔪᖅ 100%-ᒥᒃ ᕿᑐᕐᖏᐅᕐᓂᐅᔪᓂᒃ 530,631 ᐄᑯᒃᑯᑦ ᓄᓇᒥ 300 ᑭᓛᒥᑕ ᐱᓕᕆᐊᖑᔪᒃᑯᑦ ᐊᒻᒪᓗ ᓇᓗᓇᐃᖅᓯᓯᒪᔪᑦ ᑕᓪᓕᒪᓂᒃ ᐊᔾᔨᒌᙱᑦᑑᑕᐅᔪᓂᒃ ᐅᔭᖅᑲᓂᒃ ᐱᕙᓪᓕᐊᓂᐅᔪᓂ, ᐅᔾᔨᖅᑐᕐᓂᖅᓴᐅᓪᓗᑎᒃ ᑐᕇ ᐸᓚᕝᒥ ᐅᔭᕋᖁᑎᒋᔭᐅᔪᓂᒃ.
ᓄᐊᑦ ᑲᓐᑐᕇ ᒎᓘᒃᑯᑦ ᑎᒥᖁᑎᒋᔭᐅᔪᖅ ᓴᖅᑭᑎᑦᑎᓚᐅᖅᑐᑦ ᐊᖏᓂᖅᐹᖑᔪᒥ ᐅᔭᕋᖕᓂᐊᕐᓂᐅᔪᒥ ᐅᑉᓗᒥᒧᑦ 2011-ᒥ ᑐᕇ ᐸᓚᕝ ᒎᓘᖃᕐᕕᐅᔪᒥ ᓄᓇᕗᒥ, ᑲᓇᑕᒥ. ᑲᒻᐸᓂᐅᔪᖅ ᐊᑐᖅᓯᒪᔪᖅ $25 ᒥᓕᔭᒥᒃ ᐃᑰᑕᕐᓂᐅᔪᒧᑦ ᕙᑯ ᓖᒃ ᐃᓂᖓᓂ ᐱᒻᒪᕆᐅᔪᒃᑯᑦ ᐃᓚᓯᒋᐊᖅᓯᒪᖃᑦᑕᖅᖢᑎᒃ ᐱᓕᕆᐊᒥᓂᒃ ᐊᒻᒪᓗ ᐃᓂᒥᓂᒃ ᐱᖁᑎᕐᔪᐊᕆᔭᐅᔪᒃᑯᑦ. ᓯᕕᑐᔪᒃᑯᑦ ᐃᑰᑕᕐᓂᖅ 7-ᓂᒃ ᐃᑰᑕᕐᕕᖕᓂ ᐊᐅᓚᑕᐅᔪᑦ ᐱᐊᓂᒃᑕᐅᓯᒪᔪᑦ 30,000 ᒦᑕᒃᑯᑦ ᐃᑰᑕᕐᓂᒃᑯᑦ ᖃᑉᓯᑲᓪᓚᐅᔪᒃᑯᑦ ᐱᓕᕆᕝᕕᐅᔪᒃᑯᑦ ᑕᐅᕙᓂ. ᑲᒻᐸᓂᐅᔪᖅ ᓴᖅᑭᑎᑦᑎᔪᒪᓯᒪᔪᖅ ᐱᒻᒪᕆᐅᔪᒃᑯᑦ ᐅᑉᓗᒥᐅᔪᒧᑦ ᐊᑐᖅᑕᐅᔪᓐᓇᖅᑐᓂᒃ ᓇᓚᐅᑦᑖᖅᑕᐅᓯᒪᔪᒃᑯᑦ Q1, 2012-ᒥ. ᓄᐊᑦ ᑲᓐᑐᕆ ᒎᓘᑯᑦ 2012-ᒥ ᐱᓕᕆᐊᖑᔪᖅ ᑕᐃᒪᓐᓇᑦᑎᐊᖅᑕᐅᖅ ᐱᒻᒪᕆᐅᑎᒋᓂᐊᕐᒥᔪᖅ, ᐃᒻᒪᖄ 8-ᖑᓇᔭᖅᑐᑦ ᖁᓕᓪᓘᓐᓃᑦ ᐃᑰᑕᕐᕖᑦ ᑐᕌᖓᓂᖃᕐᓗᓂ 40,000 ᒦᑕᒃᑯᑦ ᓄᓇᒥ. (http://northcountrygold.com)
ᒥᐅᕕᐅ ᒎᓘᒃᑯᑦ ᐱᓕᕆᐊᖑᔪᖅ
ᕕᕗᐊᕆ 2010-ᒥ, ᐊᖕᓗᒎᓘ ᐊᓵᓐᑎ ᕼᐅᑎᖕᑯᑦ ᐱᓯᒪᓕᓚᐅᖅᑐᑦ 62-ᓂᒃ ᐅᔭᕋᖕᓂᐊᕐᓂᕐᒧᑦ ᐱᔪᓐᓇᐅᑎᓂᒃ ᒥᐅᕕᐅ ᐱᓂᓐᓯᓚᒥ. ᓄᓇᒥ ᓂᕈᐊᖅᖠᕐᓂᖅ ᑐᙵᕕᖃᓚᐅᖅᑐᖅ ᑐᕌᕐᕕᐅᔪᒪᔪᓄᑦ ᐱᓕᕆᐊᖑᔪᓄᑦ ᓄᓇᒥ ᓂᕈᐊᖅᖠᖅᑕᐅᓯᒪᔪᓂᒃ ᓄᓇᓂᒃ ᓄᓇᕗᒥ 2009-ᒥ. ᐱᔪᓐᓇᐅᑏᑦ ᑐᕌᖓᓂᖃᖅᑐᑦ ᒎᓘᖃᕐᓂᐅᔪᓂᒃ ᓇᓗᓇᐃᖅᑕᐅᓯᒪᔪᓂᒃ ᓄᓇᓂᒃ ᖃᐅᔨᓴᐃᔨᒃᑯᑦ ᑲᓇᑕᒥ 2009-ᒥ ᓄᓇᒦᓚᐅᖅᑐᒃᑯᑦ ᐊᒻᒪᓗ ᓴᖅᑭᑎᑕᐅᓪᓗᑎᒃ ᓄᕕᐱᕆᒥ ᐅᑭᐅᕆᔭᖓᓂ. ᖁᓕᒥᒎᓕᒃᑯᑦ ᐃᑲᔪᖅᑐᖅᑕᐅᓯᒪᓪᓗᑎᒃ ᖃᐅᔨᓴᕈᑏᑦ ᐱᐊᓂᒃᑕᐅᓯᒪᓕᖅᑐᑦ ᐊᖕᓗᒎᓘ ᐊᓵᓐᑎᒃᑯᓐᓄᑦ ᐊᒻᒪᓗ ᑐᑭᓯᒋᐊᕈᑎᒃᓴᑦ ᒫᓐᓇᐅᔪᖅ ᑐᑭᓕᐊᖑᓯᒪᓕᖅᑐᑦ ᐸᕐᓇᐃᓂᒃᑯᑦ ᑐᑭᓯᒋᐊᕈᑎᒃᓴᒃᑲᓐᓂᕐᓂᒃ ᖃᐅᔨᒋᐊᕈᑎᒃᓴᓄᑦ. (http://nunavutgeoscience.ca)