ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᖅᓯᕐᕕᒃ ᓇᐅᔮᑦ ᓂᒋᐊᓃᑦᑐᖅ ᐊᒻᒪᓗ ᐅᑭᐅᖅᑕᖅᑑᑉ ᑭᒡᓕᖓᓂ. ᒥᕐᖑᐃᖅᓯᕐᕕᒃ ᐅᒃᑯᓯᒃᓴᓕᖕᒦᑦᑐᖅ, 100 ᑭᓛᒥᑕᒥᒃ ᑕᕆᐅᕐᒥ ᐃᒪᖁᑎᓕᒃ ᑕᓯᕐᔪᐊᑉ ᐅᐊᖕᓇᖓᑕ ᑲᓇᖕᓂᖅᐸᓯᖓᓂ ᓄᓇᕗᒥ. ᓇᓗᓇᐃᖅᑕᐅᓚᐅᖅᑐᖅ ᑲᓇᑕᒥ ᒥᕐᖑᐃᖅᓯᕐᕕᐅᓕᕐᓂᖓᓄᑦ ᐊᒐᓯ 23, 2003-ᒥ, ᐅᒃᑯᓯᒃᓴᓕᒃ 41-ᒋᔭᐅᔪᖅ ᑲᓇᑕᒥ ᒥᕐᖑᐃᖅᓯᕐᕕᓕᐊᖑᓯᒪᔪᓂᒃ. ᒥᕐᖑᐃᖅᓯᕐᕕᒃ ᑎᑭᑕᐅᔪᓐᓇᖃᑦᑕᖅᑐᖅ ᑎᖕᒥᓲᓄᑦ ᕕᓂᐲᒃᒥ ᐅᕝᕙᓘᓐᓃᑦ ᔭᓗᓇᐃᕝᒥ ᑲᖏᖅᖠᓂᒃᑯᑦ, ᖃᒪᓂ'ᑐᐊᒃᑯᑦ, ᐅᕝᕙᓘᓐᓃᑦ ᓇᐅᔮᒃᑯᑦ. ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᖅᓯᕐᕕᒃ 20,500 ᑭᓛᒥᑕᒥᒃ ᐊᖏᓂᓕᒃ.
ᐃᓄᐃᑦ ᐊᖑᓇᓱᒃᐸᒃᑲᓗᐊᖅᑎᓪᓗᒋᑦ ᓄᓇᒥ ᑕᒡᕙᓂ, ᒥᕐᖑᐃᖅᓯᕐᕕᐅᔪᖅ ᐃᓄᖕᓄᑦ ᓇᔪᖅᑕᐅᙱᑦᑐᖅ. ᐃᓄᐃᑦ ᐅᒃᑯᓯᒃᓴᓕᖕᒥ ᓄᓇᖃᖃᑦᑕᓚᐅᖅᓯᒪᔪᑦ 1000 AD-ᖏᓐᓂ 1960-ᓄᑦ, ᐊᒻᒪᓗ ᓂᐅᕕᕐᕕᒃᑯᑦ ᒥᖅᑯᓕᖃᖅᑐᓂᒃ ᑭᐳᖃᑎᖃᖃᑦᑕᓚᐅᖅᑐᑦ 1925-ᒥ 1947-ᒧᑦ. 500 ᐅᖓᑖᓃᑦᑐᑦ ᐃᑦᓴᕐᓂᑕᖃᕐᕖᑦ ᓇᓗᓇᐃᖅᑕᐅᓯᒪᔪᑦ ᒥᕐᖑᐃᖅᓯᕐᕕᖕᒥ, ᓲᕐᓗ ᑮᔭᖃᑦᑕᕐᕖᑦ ᑎᕆᒐᓂᐊᓄᑦ, ᑐᐱᖃᕐᕕᕕᓃᑦ, ᐊᒻᒪᓗ ᐱᕈᔭᖃᕐᕕᕕᓃᑦ. ᒥᕐᖑᐃᖅᓯᕐᕕᒃ ᓴᐳᓐᓂᐊᖅᓯᒪᔪᖅ ᓄᓇᒥ ᖃᓄᐃᓐᓂᕆᓚᐅᖅᓯᒪᔭᖓᒍᑦ ᓄᓇᒥ.
ᐊᑎᖅᑖᖅᑎᑕᐅᓯᒪᔪᖅ ᐅᒃᑯᓯᒃᓴᓕᖕᒥ ᐅᒃᑯᓯᒃᓴᖃᐅᕐᓂᖓᓄᑦ ᑭᒡᓕᖃᕐᕕᐊᑕ ᐃᓗᐊ, ᒥᕐᖑᐃᖅᓯᕐᕕᒃ ᓴᐳᓐᓂᐊᖅᓯᒪᔪᖅ ᐱᒻᒪᕆᐊᓗᖕᓂᒃ ᐃᓂᖃᕐᕕᐅᔪᓂᒃ ᑐᒃᑐᓄᑦ, ᐅᒥᖕᒪᖕᓄᑦ, ᓇᓄᕐᓄᑦ, ᐊᒃᖤᓄᑦ, ᓇᒃᑐᕋᓕᖕᓄᑦ ᐊᒻᒪᓗ ᐊᒥᓱᓄᑦ ᐊᓯᖏᓐᓄᑦ ᐅᑭᐅᖅᑕᖅᑐᒥ ᐆᒪᔪᖁᑎᒋᔭᐅᕙᒃᑐᓄᑦ. ᓄᓇᖓ ᐅᒃᑯᓯᒃᓴᓕᐅᑉ ᖃᖅᑲᓕᒃ, ᒪᕋᖃᖅᖢᓂ, ᖃᐃᖅᑐᓂᒃ, ᐃᒪᖃᕐᕕᖕᓂᒃ ᐊᒻᒪᓗ ᐊᔾᔨᐅᙱᑦᑑᑕᐅᔪᓂᒃ ᓯᒡᔭᖃᕐᕕᖕᓂ ᐊᒻᒪᓗ ᓯᕗᓪᓕᖅᐹᖑᓪᓗᓂ ᒥᕐᖑᐃᖅᓯᕐᕕᐅᔪᖅ ᐃᓕᖃᕐᕕᐅᓪᓗᓂ ᐃᒪᖃᕐᕕᖕᒥ. ᐅᒃᑯᓯᒃᓴᓕᒃ ᐱᒻᒪᕆᐊᓗᒃ ᓄᓇᖅᑲᑎᒌᖕᓄᑦ ᓄᓇᓕᖕᓂ ᐊᖑᓇᓱᒡᕕᐅᖃᑦᑕᕐᓂᖓᓄᑦ, ᐊᒻᒪᓗ ᐱᒻᒪᕆᐅᑎᑕᐅᖕᒥᔪᖅ ᐃᓕᖅᑯᓯᑐᖃᑎᒍᑦ ᐃᒻᒪᕆᐅᓂᖓᓄᑦ.
ᒥᕐᖑᐃᖅᓯᕐᕕᖕᒥ ᖃᓄᐃᓕᐅᕈᓘᔭᕐᓇᖃᑦᑕᖅᑐᖅ ᓲᕐᓗ: ᓄᓇᒦᕋᐅᔭᕐᓇᖅᑐᖅ, ᐱᓱᓗᖕᓇᖅᑐᖅ, ᐆᒪᔪᓂᒃ ᑕᐅᑐᖕᓇᖅᑐᖅ. ᐳᓚᕋᖅᑎᐅᔪᑦ ᓄᓇᒧᙵᐅᔾᔨᖃᑦᑕᖅᑐᒥᒃ ᐊᑭᓖᓗᑎᒃ ᒥᕐᖑᐃᖅᓯᕐᕕᓕᐅᕈᔾᔭᐅᖃᑦᑕᖁᔭᐅᔪᑦ ᓇᓄᖃᓗᐊᕐᒪᑦ ᐅᒃᑯᓯᒃᓴᓕᒃ.
ᓇᐅᔮᑦ ᒥᕐᖑᐃᖅᓯᕐᕕᐅᑉ ᖃᓂᒋᔭᖓᓃᑦᑐᖅ. ᖃᐅᔨᒋᐊᕐᕕᒋᓗᒍ ᐱᕙᓪᓕᐊᔪᓕᕆᔨ ᓇᐅᔮᑦ ᕼᐊᒻᓚᒋᔭᖓᓂ ᑐᑭᓯᒋᐊᒃᑲᓐᓂᕈᒪᒍᕕᑦ ᐅᒃᑯᓯᒃᓴᓕᐅᑉ ᒥᒃᓵᓄᑦ ᐊᒻᒪᓗ ᐊᑎᕐᓂᒃ ᑐᓴᕈᒪᒍᕕᑦ ᑭᒃᑯᑦ ᓚᐃᓴᓐᓯᖃᖅᑎᐅᖕᒪᖔᑕ ᓄᓇᒧᙵᐅᔾᔨᕙᒃᑐᑦ ᑭᕙᓪᓕᕐᒥ. ᓇᐅᔮᑦ ᐃᓱᒪᒋᔭᐅᕙᒃᑐᖅ ᐱᒋᐊᕐᕕᐅᖃᑦᑕᕐᓂᖓᓄᑦ ᐅᐸᒍᑎᓂᐊᕐᓗᓂ ᒥᕐᖑᐃᖅᓯᕐᕕᖕᒧᑦ. ᒥᕐᖑᐃᖅᓯᕐᕕᖕᒧᑦ ᑎᑎᕋᕐᕕᒃ ᐅᒃᑯᓯᒃᓴᓕᖕᒧᑦ ᓇᐅᔮᓃᒻᒥᔪᖅ.
Ukkusiksalik National Park of Canada Office
P.O Box 220 Repulse Bay, NU, X0C 0H0
Ph: (867) 462-4090 Fx: (867) 462-4095
E-mail: ukkusiksalik.info@pc.gc.ca
Website: www.pc.gc.ca/ukkusiksalik
