ᓄᓇᒋᔭᖅ
ᓇᐅᔮᓂ ᐱᓱᓗᒃᖢᓂ ᐅᓂᑉᑳᖅᑐᐊᖑᔪᓐᓇᖅᑐᖅ ᐃᓅᓇᓱᐊᕐᓂᕐᒧᑦ ᐅᑉᓗᒥᐅᔪᖅ ᐅᑭᐅᖅᑕᖅᑐᒥ, ᑕᐃᑉᓱᒪᓂᑐᖃᖅ ᖃᓄᐃᓐᓂᐅᖃᑦᑕᓚᐅᖅᑐᑦ ᓴᖅᑭᔮᖅᖢᑎᒃ ᓯᕗᓂᒃᓴᒧᓪᓗ ᐱᕙᓪᓕᐊᓂᐅᔪᑦ ᓴᖅᑭᔮᖅᖢᑎᒃ. ᑐᒃᑐᑦ ᐊᒥᖏᑦ ᐊᒻᒪᓗ ᓇᓄᕋᐃᑦ ᐸᓂᖅᓯᖅᑐᑦ ᐃᒡᓗᒋᔭᐅᔪᑦ ᓴᓂᕋᖏᓐᓂ, ᐊᒻᒪᓗ ᓂᖀᑦ ᐃᖃᓗᐃᓪᓗ ᓂᕕᙵᔪᑦ ᐸᓂᖅᓰᕝᕕᖕᓂ. ᖃᒧᑏᑦ (ᐃᓕᖅᑯᓯᑐᖃᑎᒍᑦ ᐃᓄᐃᑦ ᖃᒧᑎᒋᖃᑦᑕᖅᓯᒪᔭᖏᑦ) ᖃᓕᕇᓕᖅᓯᒪᔪᓐᓇᖅᑐᑦ ᐊᐅᔭᒃᑯᑦ ᐊᑐᖅᑕᐅᔾᔮᖏᓚᐅᕐᓂᖏᓐᓂ ᓴᓂᐊᓂ ᖃᒧᑕᐅᔭᐃᑦ ᓯᑭᑑᑦ ᐅᖅᓱᖅᑐᖅᑐᑦ ᑕᐃᒪᐅᓪᓗᑎᒃ. ᐃᓐᓇᑐᖃᐃᑦ ᑲᒥᒃᓯᒪᔪᑦ ᕿᓯᖕᓂᒃ ᑕᑯᒐᔪᖕᓇᖅᑐᑦ ᓂᐅᕕᕐᕕᓕᐊᖅᑐᑦ ᑯᐊᐸᒃᑯᓐᓄᓪᓘᓐᓃᑦ.
ᑕᑯᔪᒥᓇᓪᓚᕆᒃᑐᖅ ᐳᓚᕋᖅᑎᓄᑦ ᖁᕕᐊᒋᔭᐅᒻᒪᕆᓲᖅ ᐱᓱᓗᖕᓂᖅ ᒥᑦᑕᕐᕕᐅᑉ ᐅᐊᖕᓇᖓᓄᑦ ᐊᑦᑎᒃᑐᒃᑯᑦ, ᐅᔭᕋᖃᓪᓚᕆᒃᑐᒃᑯᑦ ᐱᓱᓗᒡᕕᒃᑯᑦ ᓄᓇᓕᐅᑉ ᐊᕙᑖᒍᑦ. ᐱᑕᖃᖅᖢᓂ ᒥᑭᔪᓂᒃ ᑕᓯᕐᓂᒃ ᐃᒪᒐᓚᖕᓂᒡᓗ, ᖃᖅᑲᕋᓛᑦ ᐱᑕᖃᖅᑐᑦ ᐅᑭᐅᖅᑕᖅᑑᑉ ᒥᕈᖅᑐᖁᑎᖏᓐᓂᒃ ᐆᒪᔪᖏᓐᓂᒡᓗ. ᖃᓂᓪᓕᒋᐊᖅᖢᒋᑦ ᑕᓰᑦ ᒪᓐᓂᖃᖃᑦᑕᖅᖢᓂ.
ᐃᑉᔪᐃᑦ ᑕᐃᒪᐅᔪᑦ ᐱᕈᖅᑐᓖᑦ ᐱᕈᖅᓯᐊᓂᒃ. ᐊᔾᔨᒌᙱᑦᑑᑕᐅᔪᑦ ᐱᕈᖅᓯᐊᑯᓗᐃᑦ ᑎᖓᐅᔭᐃᓪᓗ ᐱᕈᖅᐸᒃᑐᑦ ᓇᓂᑐᐃᓐᓇᖅ ᐃᑉᔪᖃᑐᐊᖅᐸᑦ. ᐊᐅᔭᖅ ᐱᒋᐊᓕᓵᖅᑎᓪᓗᒍ, ᓄᓇ ᐱᑕᖃᖅᑐᒻᒪᕆᐊᓘᖃᑦᑕᖅᑐᖅ ᐊᔾᔨᒌᙱᑦᑑᑎᐊᓗᖕᓂᒃ ᐅᑭᐅᖅᑕᖅᑑᑉ ᐱᕈᖅᓯᐊᖏᓐᓂᒃ.
ᐱᓱᓗᒡᓗᑎᑦ ᓯᒡᔭᒥ ᓂᐅᕕᕐᕕᐅᑉ ᖃᓂᒋᔭᖓᓂ ᐱᒋᐊᕐᓗᑎᑦ. ᑕᐃᒪᐅᔪᖅ ᓂᐅᕕᕐᕕᑐᖃᖅ, ᐊᐅᐸᓗᒃᑐᒥ ᖁᓛᖃᖅᖢᓂ ᐊᒻᒪᓗ ᓴᓂᕋᖓ ᖃᐅᓪᓗᖅᖢᓂ.
ᑐᓚᒃᑕᕐᕕᐅᕙᖕᒥᔪᖅ ᑕᒪᓐᓇ ᓇᐅᔮᕐᒥᐅᓄᑦ. ᑕᒡᕙᓂ, ᐅᓐᓄᒃᑯᑦ, ᐊᖑᓇᓱᒃᑏᑦ ᐅᑎᕌᖓᒥᒃ ᕿᓇᓗᒐᖅᓯᒪᓪᓗᑎᒃ, ᓇᑦᑎᖅᓯᒪᓪᓗᑎᒃ ᑑᒑᓕᒃᓯᒪᓪᓗᑎᒡᓘᓐᓃᑦ ᑕᒪᐅᙵ ᑐᓚᒃᐸᒃᑐᑦ.
ᓯᒡᔭᒥ ᒪᔪᕆᐊᖅᖢᓂ ᓄᓇᓕᐅᑉ ᐃᓗᕕᖏᓐᓄᑦ ᑎᑭᓐᓇᖅᑐᖅ, ᓴᓐᓂᖓᔪᑯᓗᖏᑦ ᖃᐅᓪᓗᑦᑎᐊᖅᖢᑎᒃ ᓇᐸᔪᑦ, ᓇᓗᓇᐃᔭᐃᓯᒪᔪᑦ ᓄᓇᖅᑲᑎᒋᔭᐅᓚᐅᖅᑐᓂᒃ ᐃᓄᖁᑎᖏᓐᓂᒡᓗ.
ᐱᓱᓗᖅᑳᕐᓗᑎᑦ ᕼᐊᒻᓚᒃᑯᓐᓅᕐᓗᑎᑦ, ᓄᓇᓕᖕᒥ ᑲᑎᒪᕝᕕᒃᑕᓕᒃ ᐱᙳᐊᕐᕕᖃᖅᖢᓂᓗ.
General Information
| ᐃᓄᒋᐊᖕᓂᖓ | 999 (95% ᐃᓄᐃᑦ, 5% ᐃᓄᓪᓚᑦᑖᖑᙱᑦᑐᑦ) |
| ᐅᖃᓘᑎᖏᑦᑕ ᐱᒋᐊᕈᑎᖏᑦ | 867 |
| ᐊᕕᒃᑐᖅᓯᒪᔪᒃᑯᑦ ᓄᓇᓕᒃ | ᑭᕙᓪᓕᖅ |
| ᖃᐅᔨᓴᐅᑎᖓ | ᑭᕙᓪᓕᐅᑉ ᖃᐅᔨᓴᐅᑎᖓᓂᒃ ᒪᓕᒃᑐᖅ |
| ᑐᕌᕈᑎᖓ ᓄᓇᖓᑕ | X0C 0H0 |
| ᓇᐅᒃᑰᕐᓗᓂ ᑕᐃᑯᙵ ᑎᑭᓐᓇᔭᕐᓂᖅ | ᕕᓂᐲᒃ - ᑲᖏᖅᖠᓂᖅ ᑎᖕᒥᓲᒃᑯᑦ First Air-ᑯᑦ ᐊᒻᒪᓗ Calm Air-ᑯᓪᓗ ᖃᖓᑕᔭᕆᐊᓕᖕᓄᑦ |
| ᑮᓇᐅᔭᖃᕐᕖᑦ | ᑮᓇᐅᔭᓕᕆᔾᔪᑎᑕᓕᒃ ᓂᐅᕕᕐᕕᖕᒥ ᑯᐊᐸᕐᑯᓐᓂᓗ. ᐊᐅᒃᑕᔫᒃᑯᑦ ᐊᑭᓖᔾᔪᑏᑦ ᐊᑐᖅᑕᐅᔪᓐᓇᖃᑦᑕᖅᑐᑦ ᓇᓂᑐᐃᓐᓇᖅ ᓂᐅᕕᕐᕕᖕᓂ |
| ᐃᒥᐊᓗᒃ | ᐃᒥᐊᓗᒃ ᑭᒡᓕᖃᖅᑎᑕᐅᔪᖅ ᐊᒻᒪᓗ ᐊᐅᓚᑕᐅᔪᖅ ᑲᑎᒪᔨᕋᓛᓄᑦ |
